Алматы облысы әкімдігінің ұйымдастыруымен Бішкек қаласында композитор, күйші, дирижер, Қазақстанның Халық әртісі, Мемлекеттік сыйлықтың лауреаты, Халық Қаһарманы Нұрғиса Тілендиевтің 100 жылдығына арналған «Әлқисса» атты шығармашылық кеш өтті!

Қазақ музыкасының тұтас бір дәуіріне айналған композитордың мерейтойы А.Малдыбаев атындағы Қырғыз ұлттық опера және балет театрында ұйымдастырылды. Шараға ҚР Мәдениет және ақпарат министрі Аида Ғалымқызы, Алматы облысының әкімі Марат Елеусізұлы, Жамбыл облысының әкімі Ербол Шырақпайұлы арнайы келді. Ал екінші тараптан Қырғыз Республикасының мемлекеттік хатшысы Марат Иманқұлов, Қырғызстанның Мәдениет, ақпарат және жастар саясаты министрі Мирбек Мамбеталиев қатысты. 

Кеш барысында ұлы даланың үнін бір оркестрге жиған Нұрғиса шығармашылығы көрермен жүрегіне еніп, ерекше сезім сыйлады. Сондай-ақ, экраннан композитор талантына тәнті болған қазақ-қырғыз елдерінің ұлы тұлғаларының пікірі дыбысталды. 

Кең ауқымды шарада асылдың тұяғы Дінзухра Тілендиева, Н.Тілендиевтің ізін жалғаушы күйші-композитор Секен Тұрысбек, Қазақстанның Еңбек сіңірген қайраткері Нүркен Әшіров, «Құрмет» орденінің иегері Зарина Алтынбаева және Қырғыз Республикасының Еңбек сіңірген әртісі Закирбек Дуйшенбек уулы қатысты. Сонымен қатар, Алматы облысының «Сазген», «Құлансаз» ансамбльдері және «Алтынай» халық биі ансамблі өнер көрсетті. Бұл әсерлі кешті бір мыңға жуық көрермен тамашалады.